Surga, Pantun Betawi

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca pesan nabi lewat pantun Betawi di bawah ini.

Tinggi-tinggi puncak di gunung

Lebih tinggi awan di langit

Surge indahnye ga kepalang tanggung

Lu ga bakal dapet kalo lu masih pelit

 

Indahnye bukit di puncak Tursine

Tempat nabi Musa sempat mendaki

Di surge banyak bidadarinye

Ente mao ape die udeh nanti

 

Surge katenye ade peringkat

Firdaus entu yang paling tinggi

Jike same die ente kepikat

Segera ngelamar sebelon pegi

 

Surge entu delapan tingkatan

Al-Firdaus yang paling tinggi

Nabi kite selalu ajarkan

Kalo mao surge baelah budi

 

Kalo bedoe mintelah Firdaus

Telage al-Kautsar penghilang haus

Bolehlah nanti minum di sane

Asalkan nabi bolehkan kite

 

Nabi kite pernah cerite

Tentang surge ame nerake

Surge banyak penghuninye

Orang-orang yang miskin dulunye

 

Nerake entu malah sebaliknye

Nikmat di sano ga pernah ade

Banyak perempuan ade di sane

Janganlah ente salah satunye

 

Di surge banyak bidadari

Wajahnye ayu cantik sekali

Entulah surga buat laki-laki

Termasuk yang belon punye bini

 

Buat yang perempuan pasti juge ade

Kite bilang die bidadare

Tampangnye gagah sungguh menawan

Termasuk buat yang masih perawan

 

Entulah keadilan yang Maha kuase

Lelaki dikasi begitu juge yang dare

 

Di surge ade banyak anak sungai

Airnye jernih manis sekali

Lebih putih dari susu

Lebih manis dari madu

 

Air sungainye ngalir ke taman-taman

Sampe nembus masuk ke halaman

Di sano kite bise jumpe teman

Yang dulu pernah atu pengajian

 

Buat sepasang suami istri

Bise bepisah bise ketemu lagi

Bepisah bile yang atu di nerake

Bise besatu asal same di surge

 

Buat yang mao bantuin teman

Ade syafa’at yang dijanjikan

Asal kite udeh aman

Masuk di surge Darul Ihsan

 

Syafa’at juge boleh didapat

Dari pare Nabi ame Malaikat

Juge dari puase ame sholat

Dari ulame juge sahabat

 

Cerite orang yang paling akhir

Masuk ke surge ga sempet kepikir

Lame di nerake keplintir-plintir

Bukan lagi seperti disamber petir

 

Dimasukin die ke sungai al-hayat

Keluar lagi udeh ga keliat

Bekas sikse api yang menjilat-jilat

Tapi masih ade sise tante di jidat

 

Die disuruh bediri di depan

Surge dibuke lalu ditutup pelahan

Die terkesima menahan perasaan

Ingin masuk surge aduh mane tahan

 

Tuhan lalu segere berfirman

Tanye ape yang die inginkan

Ga ade jawaban yang bise diucapkan

Cume nyesal kenape ga kedapetan

 

Lame bediri di depan pintu

Nungguin kapan boleh cepet masuk

Die mohon kepade Yang atu

Saking khusunye malahan jadi kikuk

 

Die nawar sambil ngerayu

Biar diizinin masuk di pintu

Walo ga boleh sampe kedalem

Asal kage terus tenggelem

 

Surgenye entu yang paling rendah

Die ngerase yang paling megah

Padahal dulu kage pernah susah

Tinggalnye juge di Pondok Indah

 

Tuhan akhirnye kesipu-sipu

Ngizinin die yang masih malu

Banyak dosenye di kale dulu

Yang bejibun dari hilir sampe ke hulu

 

Itu cerite tolong diingat

Dari sebuah hadis dengan riwayat

Bukannye dari sohibul hikayat

Yang ga jelas ame kage ngikat