Sifat-sifat Nabi, Pantun Betawi

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca sejarah perjalanan nabi lewat pantun Betawi di bawah ini.

Orang bertanye tentang sifat-sifatnye

Apaan aje yang sahih riwayatnye

Abis ‘ntu amalin teladannye

Jadilah kite ummat pilihannye

 

Baginda Nabi seneng banget bersiwak

Ngebersiin gigi beliau pake miswak

Baginde juge sayang ame anak-anak

Yang udeh gede kage lupe diajak

 

Kaum ibu nabi kasih perhatian

Yang perempuan juge dapat kesempatan

Orang badu’I juge kedapetan

Semue ‘eni bikin kesel setan

 

Korme Nabi namanye ajwa’

Bentuknye bulet kage begitu besar

Ente jangan sering banget ketawa’

‘Nti malah jadi nggak sadar

 

Nabi seneng pake baju putih

Selaen indah juga keliatan rapih

Tentu aje Nabi pake yang bersih

Nyang nyiapin Nabi bilang terimekasih

 

Baginde Nabi sering pake cincin

Di jari kelingking beliau pasangin

Sebelah kanan bukan di sebelah kiri

Pesannye Nabi jadi orang jangan iri

 

Nabi juge pelihare jenggot

Perkare gambil kaga bikin repot

Hukumye sunnah jangan pake sewot

Ape lagi ade yang adu otot

 

Kumis Nabi modelnye ditipisin

Banyak orang ko’ malah manjangin

Ane cume pengen bilangin

Terserah ente mau gak perhatiin

 

Nabi seneng pake minyak wangi

Yang baunye kaye minyak kasturi

Makenye di rumah atawe mau pergi

Waktunye pagi dan juge malem hari

 

Nabi sayang ame anak yatim

Setiap ketemu nabi pasti salim

Nabi bantu dan peratiin

Kalo pade sakit nabi nengokin

 

Nabi juge dikenal pemalu

Kalo ade saleh beliau kage ragu

Care negurnye tanpe sokbelagu

Kalo senyum beliau cume tersipu

 

Aisyah udeh pernah ditanye

Tolong ceritain sifat suaminye

Aisyah ngejawab dengan sungguhan

Akhlak Rasulullah ‘entu al-Qur’an

 

Kitab Al-Qur’an juge memujinye

Dengan bercerite tentang sifatnye

Wa Innaka la’ala khuluqin azim

Kita sambut dengan: sodaqollah al-azim

 

Anas cerite dari lubuk hati

Sepuluh taon die pernah ngabdi

Baginde Nabi gak pernah marahi

Gak pernah bilang kok gitu nggak gini

 

Begitu mulie sifat-sifat Nabi

Kudu kite contoh wajib teladani

Jangan ampe cume diketahui

Apelagi dikritik pake caci maki