Nikah, Pantun Betawi

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca pesan nabi lewat pantun Betawi di bawah ini.

Nikah entu hukumnye sunnah

Kalo malemnye baru ibadah

Mao sekali mao due kali ye terserah

Asalkan ente jangan serakah

 

Kalo ente cari bini pilihan

Ade 4 hal tolong pertimbangkan

Ade cantik ame kaye juge turunan

Namun agame yang ditaro di depan

 

Punye bini atu atawe due same aje

Yang penting die ga bikin suse

Kalo ente udeh lame mendude

Cepetan aje jangan terus ditunde

 

Lelaki emang boleh poligami

Miliki lebih dari atu bini

Tapi entu pasti ade syaratnye

Adilkah ente pade keduenye

 

Jika orang sering kawin lagi

Emang apaan sih yang dicari

Kalo betul mao ikut sunnah nabi

Jangan dong cume soal yang ini

 

Berpoligami emang boleh

Asal ente orang yang soleh

Kalo engga bise berabe

Belon ape-ape udeh jadi jande

 

Keluarge idaman keluarge yang sakinah

Penuh kasih sayang serte mawaddah

Buatlah suami betah di rumah

Sambutlah dier ame senyum ramah

 

Kalo udeh seperti itu

Mertur jadi sayang menantu

Rumah bagaikan kaya’ di surge

Kondisi eni kudu dijage

 

Batu bare emang warnanye item

Kasi api dikit die menyale

Kalo suami istri lagi berantem

Sale atunye kudu mengale

 

Kalo emang mao bedamai

Perselisihan entu kudu dilerai

Jangan cari siape yang salah

Nanti malah semakin parah

 

Nabi sempat kasi solusi

Buat mereka suami istri

Jika emang udeh kaye’ gini

Inget kebaikan yang pernah diberi

 

Minggu pagi enak sekali maen sepede

Istirahatnye minum kopi di bawah tende

Waktunye nikah jangan lagi ditunde

Ga dapet perawan ambil aje yang jande

 

Kalo rejeki sering kali jadi penghalang

Buat ngelamar pujaan ati bername si Endang

Jangan jadikan entu sebagai penghadang

Kawin aje dulu rejeki nanti kan datang

 

Anak jauh suami jauh

Lame menanti akhirnye jenuh

Karene entu pilihlah suami

Yang sayang anak juge sayang bini