KHALIFAH RASULULLAH, PANTUN BETAWI

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca sejarah perjalanan nabi lewat pantun Betawi di bawah ini.

Khalifah maknenye pengganti

Yang digantiin udeh mati

Aturannye kudu dita’ati

Fatwanye ayo dihormati

 

Khalifah pertama Abu Bakar

Dikenalnye amat sabar

Tapi semangatnye terus ngebakar

Ajaran Rasul tak pernah ditukar

 

Due taon setengah beliau ngemimpin

Qur’an ame Sunnah kage dilupain

Orang nyang murtad langsung diperangin

Yang cobe nakal kage dilindungin

 

Abu Bakar punye kelebihan

Gelar al-Siddiq nabi berikan

Selaen sahabat, ame mertua

Suke berteman juge membela

 

Khalifah kedue namanye Umar

Si pemberani ame sangar

Ame mereka yang ngelanggar

Diadepin tanpe rase gentar

 

Umar ngemimpin due belas taonan

Amat teguh penuh kesabaran

Juge adil berhasil disebarkan

Aman tentrem jadi dirasakan

 

Prinsipnye bagus dan juge nyata

Hidup sederhana same ame rakyatnya

Beda ame kaisar dan raja

Hidup mewah dan pesta pora

 

Umar sering pergi ngenyamar

Mencari tau kabar beredar

Nggak mau rakyat terlantar

Bantuanpun langsung diantar

 

Waktu ‘entu Umar ngedengar

Kabar tak sedap kaye halilintar

Ade ibu yang masak batu

Die ngeluh gak ade yang bantu

 

Akhirnye Umar nanyain ‘ntu

Ibu ngejawab sambil gerutu

Umar nangis kok ampe gitu

Langsung marahin pare pembantu

 

Uang zakat tolong disalurin

Uang Baitul Mal kudu dibagiin

Buat mereka yang kesusahan

Nanggung hidup sendirian

 

Usman jabat khalifah ketige

Kemurnian Qur’an beliau jage

Ngumpulin mushaf yang ude ade

Disatuin dalem satu rosem aje

 

Usman dikenal sebagai jutawan

Beliau juge terkenal dermawan

Die dekatin teman juge lawan

Bukan aje pade hartawan

 

Usman dapetin kehormatan

Dapetin jodoh due perawan

Bukan aje cantik menawan

Anaknye Rosul wanita impian

 

Khalifah keempat namanye Ali

Orangnye berani gede punya nyali

Bocah pertame yang masuk Islam

Ame semue die beri salam

 

Ali kudu kita cintain

Gitu juge khalifah yang laen

Jangan malah dicaci makiin

Ame semue nyok kite belain

 

Ali mindahin ibu kote

Dari Madinah ke kota Kufah

Tata kote die kelole

‘Ntu kote jadi makin indah