Hijrah Ke Madinah, Pantun Betawi

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca sejarah perjalanan nabi lewat pantun Betawi di bawah ini.

Kale orang Makkah terus aje ganggu

Tiap harinye selalu begitu

Orang Islam diejek ame disikse

Jadi heran kenape gak jere

 

Liat kondisi yang dah gak ketahan

Tuhan merintah biar ambil tindakan

Semue ummat kudu disiapkan

Untuk berhijrah perlahan-lahan

 

Orang Qurasiy heran kok demikian

Liat ummat Islam yang ramai bepergian

Hijrah ke Yasrib kote menjanjikan

Kote pertolongan ame setie kawan

 

Waktu Nabi dapet giliran

Semuepun direncanakan

Ali disuruh gantiin tiduran

Di kasur Nabi die selimutan

 

Abu Bakar ame anaknye bantu

Gak lupe juge atu orang pembantu

Nunjukin jalan jadi pemandu

Biar gak nyasar atawe keliru

 

Pemude Quraisy ikutan ngepung

Rumahnye Nabi jadi beban di punggung

Biar ngebunuh kage pake bingung

Tanggung jawabnye same rate ditanggung

 

Nabi ngambil pasir terus ngelempar

Pare pemude langsung terkapar

Padahal mukenye kage ditampar

Pade-pade pules tanpe alas tikar

 

Nabi melangkah perlahan-lahan

Penuh tawakkal kepade Tuhan

Akhirnye dateng banyak ketenangan

Walo sebenernye penuh tantangan

 

Ke arah Jabal Nur Nabi melangkah

Padahal entuh berlawanan arah

Bukan menuju arah Madinah

Siasat ‘eni bikin Quraish payah

 

Pare pemude tibe-tibe kebangun

Ngak tau nye matahari nembus ubun

Pedang terhubus die pade ayun

Sise tenage kudu dihimpun

 

Eh.. kaget banget kaye-kaye terfakur

Ngak tau nye anak bocah di tempat tidur

Kesel nggak sadar ampe tidur ngedengkur

Padahal ngelonjor bukan di bale kasur

 

Quraisy bikin sayembare pengumuman

Hadiahnye bener-bener menggiurkan

Buat siape aje yang bise mendatangkan

Kepala Sang Nabi dibawe ke hadapan

 

‘Enih bener-bener perkare kebangetan

Emang udeh nggak ade kerjaan

Kenape sih Nabi kok pake digituin

Tapi anehnye kok bise diterusin

 

Sang Nabi ngumpet di dalem goe

Ame Abu Bakar sahabat setie

Terus-terusan bedue berdo’e

Biar musuh-musuh bise diperdaye

 

Biar pegimane Abu Bakar tetep takut

Die kuwatir kalo Nabi diangkut

Mau nggak mau die pasti kudu turut

Kalo dah begitu die harus tetep nuntut

 

Biar pegimane ape boleh dikate

Abu Bakar terus nangis terbate-bate

Nabi ngehibur beliau bersabde

Jangan takut dan sedih Allah ame kite

 

Siti Asma dateng die bawe kabar

Kabar Quraisy ceritanye pade nyasar

Keliatannye rame-rame ilang sabar

Nggak tanye pade bodo kalah pintar

 

Ade Abdullah yang ngangun kambing

Di sekitar goe kerjaannye ngenyuplai

Makanan minuman dan hasil nguping

Perintah begini die kage pernah lalai

 

Quraisy berhasil dikelabuin

Pake taktik Nabi yang bikin ngeselin

‘Eni pasti dah Allah yang ngajarin

Orang-orang ‘ntu putus ase dikerjain

 

Di tengah jalan Nabi diikutin

Banyak orang pengen ngikut nyariin

Kegode hadiah yang dijanjiin

Tapi Nabi nggak sampe mikirin

 

Suroqoh sempet ngelihat rombongan

Nabi yang jalan jumlahnye tigaan

Bekas tapak onta yang masih keliatan

Terus die ngejar ampir-ampir deketan

 

Kude Suroqoh jatoh ke perosok

Masuk ke pasir ‘ntu kude jadi anjlok

‘Eni bener-bener kejadian mencolok

Eh emang dasar si Suroqoh goblok

 

Suroqoh ngaku akhirnye cerite

Die ngejar gare-gare berite

Akhirnye die ngucapkin syahadat

Ngakuin Islam die terus betobat

 

Suroqoh ikhlas die ucap ikrar

Die pegang janji kage bakal ingkar

Dibilanggin Nabi die pake baju kaisar

Bukan sekarang tapi bakal entar

 

Nabi pesen bilang ame die

Jangan ampe die nyebar cerite

Akhirnye die pulang balik ke Makkah

Bise dibilang die menang tapi kalah

 

Suroqoh ngumpetin die punye Islam

Tinggal nunggu waktu buat terus terang

Fathu Makkah punye kesan mendalam

Di saat ‘entu Islamnye die udah terang

 

Nabi selamet tibe di Yasrib

Waktunye udah deket-deket maghrib

Nabi berjalan ame sahabat karib

Kage ngerase ade yang aib