Fathu Makkah, Pantun Betawi

Masyarakat Betawi mengenal bentuk pantun dalam kehidupan sehari-hari, menurut Chaer (2012) pantun baris pertama dan kedua disebut sampiran, baris ketiga dan keempat baru berupa isi pantun. Pola persajakan pantun berbunyi a-b-a-b, namun pada pantun Betawi sendiri juga dikenal dengan bunyi pola persajakan a-a-a-a seperti pada pantun Betawi karangan Ahmad Lutfi Fathullah yang membaca sejarah perjalanan nabi lewat pantun Betawi di bawah ini.

Pade taon delapan hijriah

Nabi ngutus sahabat tuk ibadah

Pergi haji ke kote Makkah

Tapi di jalan kudu pade ngalah

 

Rombongan Rasul ga boleh masuk kote

Padahal janjinye boleh-boleh aje

Yang mo haji kage ape-ape

Asalkan pade jangan bikin rame

 

Dengar cerite Nabi marah besar

Padahal Nabi dikenal penyabar

Lagunye musyikirin udeh keterlaluan

Kalo dah gitu kasih aje pelajaran

 

Sepuluh ribu pasukan disiapkan

Ngebekel senjate ame diberi pesan

Ga boleh bunuh ngerusak sembarangan

Juge ati-ati kage bole serampangan

 

Nabi mesen ame semue pasukan

Kudu istiqomah taat ame pesan

Yang ade di Ka’bah dikasih aman

Begitu juge di rumah Abu Sofyan

 

Empat orang yang bole diabisin

Sebab dulu Nabi amat dilukain

Gare-gare ga sekalinye tau diri

Benci banget Islam dah sampe ulu hati

 

Peristiwe ‘eni bikin musyrikin kalut

Dulu pade berani kok jadi pengecut

Pade ketakutan lari kaya cecurut

Gimane takutnye kage perlu disebut

 

Nabi masuk lewat kampung Kudai

Ga ade yang lawan ga ade yang lerai

Khalid bin Walid masuk lewat Ma’la

Gesekan kecil bikin pusing kepala

 

Kote Makkah bise dimilikin lagi

Meski Nabi baru nyobe sekali

Kemenangan ‘eni yang Allah beri

Buat ummat Islam yang Dia ridhoi

 

Isyaratnya ade keliat

Waktu Nabi bace surat

Surat al-Nasar jadi isyarat

Padahal isinya cume tige ayat

 

Baginda maklum senyum menangis

Sebab tugasnye dikit lagi abis

Fatimah kaget die belon ma’lum

Ngeliat ‘ntu baginde senyum

 

Baginde cerita maksud ame arti

Isyarat pisah bakal nemu lagi

Semue kite dipanggil Ilahi

Nabi duluan abis ‘ntu sang putri

 

Orang Makkah nungguin putusan

Hatinye pasti pade deg-degan

Pade takut dipenggal gantian

‘Ntu sebabnya pade kebingungan

 

Nyatenye Nabi amatlah baik

Gak ade dendem nyang ngusik-ngusik

Dade pamannye pernah dicabik

Belon lagi tantangan pelik

 

Nabi milih buat maafin

Atas semue yang perne dilakuin

Asal aje jangan main-main

Ame lakon yang kaga ngenakin

 

Orang Makkah kaget ngomentar

Akhun karim ibn Akhin Karim

Hati nyang kuatir gak lagi ngegetar

Kerase sejuk abis makan es krim