Cerita Betawi “bhineka Tunggal Ika”

 

“Ampir gue kemplang tu orang!” kata Bang Hamdan marah-marah, “Sembarangan aje ngatain bendera orang. Biar jelek-jelek juga bendera gue tuh, riwayatnya jempolan. Huh, die nggak tau sih! Gue bole rebut dari ujung hotel De-Sen tuh dulu waktu zaman siap-siapan …” “Ude-ude deh!” sahut bininya, “nggak same tenggak tuh kopi, pan katanye lu mau ke Gambir!”

Begitulah di tanggal 17 Agustus itu setelah berdandan rapi dan tak lupa pake lencana merahputih di dadanya, berangkatlah Bang Hamdan ke depan Istana. Bininya ogah ikut, lantaran ia tak suka berdesak-desakan, gampang pusing, gampang mabok katanya.

“Wah, ude rame!” bisik Bang Hamdan setibanya di depan Istana. Tapi die nyelak terus, maju. Dia mau lihat Bung Karno dari dekat. “Eh-eh,” katanya, “dasar orang gede, tetap angker aje keliatannya!” Tapi heran juga dia, waktu Bung Karno lagi pidato berapi-api banyak orang asyik isi perut masing-masing.

“Bukannya die dengerin omongan Bapak kita, eeh pade enak-enakan nongkrong gegares …” katanya geram, “Minum es lah, ngelebok ketoprak lah!” tambah kesel lagi ketika dilihatnya banyak lelaki-lelaki pada cengar-cengir melirik perempuan-perempuan, malah ada yang iseng sengaja main dorong-dorongan, hingga Bang Hamdan ngomel sendirian: “Suse deh bangse gue sih …” Kira-kira pukul satu ia tiba lagi di rumahnya. Segera disambut oleh bininya: “Pegimane Bang, rame?” Serenta menghapus-hapus keringat, jawabnya: “Rame sih rame, cuman begitu: banyak orang nonton orang, banyak yang bercande-cande, banyak yang gegeres!”